Gjykata Themelore në Ferizaj ka dënuar me 11 vite burg dhe 6 mijë euro gjobë edukatoren me inicialet M.A., e akuzuar për keqtrajtimin e fëmijëve në një kopsht privat në këtë qytet.
Sipas vendimit të shpallur nga Departamenti për të Mitur, ajo u shpall fajtore për veprën penale “keqtrajtim apo braktisje e fëmijës”, për të cilën u dënua me 11 vite burg, si dhe për “lëndim të lehtë trupor”, për të cilën mori 6 muaj burg, dënim që me pëlqimin e saj u zëvendësua me 6 mijë euro gjobë.
Sipas gjykatës, ngjarja ka ndodhur më 4 dhe 5 nëntor 2025, kur edukatorja dyshohet se ka keqtrajtuar dy fëmijë 2-vjeçarë në kopshtin “M.” në Ferizaj, duke përdorur dhunë fizike dhe psikologjike. Ajo akuzohet se i detyronte me forcë të flinin, i shtynte, i tërhiqte për flokësh dhe i përplaste në dysheme. Në një rast, njërit prej fëmijëve i shkaktoi edhe lëndime në kokë, duke i shkulur flokë dhe dëmtuar lëkurën. /Lapsi.al
