Serbia po vazhdon përpjekjet për të ndikuar te elektorati serb në Kosovë edhe në prag të zgjedhjeve të parakohshme parlamentare të 7 qershorit, duke u bërë thirrje serbëve të votojnë për Listën Serbe, subjekt politik që gëzon mbështetjen e plotë të Beogradit.
Drejtori i së ashtuquajturës Zyrë për Kosovën në qeverinë serbe, Petar Petkoviç, u ka bërë thirrje serbëve të zhvendosur nga Kosova që të marrin pjesë në zgjedhjet e ardhshme dhe të votojnë për Listën Serbe.
Sipas mediave serbe, Petkoviç ka qëndruar në Kragujevc, ku është takuar me serbë të zhvendosur nga Kosova, duke i ftuar ata të mbështesin Listën Serbe në zgjedhjet e 7 qershorit.
“Ju të gjithë e dini se po afrohen zgjedhje të tjera të rëndësishme. E kuptoj që njerëzit janë të lodhur, sepse kemi pasur shumë procese zgjedhore dhe një krizë të madhe politike e paqëndrueshmëri në Prishtinë, por varet nga ne të durojmë, të luftojmë dhe të qëndrojmë të bashkuar dhe të vendosur, ashtu siç kemi qenë deri tani”, deklaroi ai.
Petkoviç e cilësoi fitoren e Listës Serbe si “garanci për mbijetesën e serbëve në Kosovë”.
“Ky është një tubim dhe një mundësi për t’ju ftuar të gjithëve të dilni në zgjedhje më 7 qershor dhe të votoni për Listën Serbe, sepse fitorja e saj në këto zgjedhje është garanci për mbijetesën e serbëve në Kosovë dhe siguri që ne do të vazhdojmë të ndërtojmë komunitetet tona dhe të investojmë në to”, tha ai.
Zgjedhjet e parakohshme parlamentare në Kosovë do të mbahen më 7 qershor.
