Modelja dhe influencerja Elsie Hewitt ka zbuluar se po kujdeset “e vetme” për vajzën e saj të porsalindur, mes raportimeve për ndarjen nga aktori dhe komediani Pete Davidson.
Çifti mirëpriti vajzën e tyre, Scottie Rose, në fund të vitit të kaluar, por sipas mediave të huaja, marrëdhënia e tyre ka marrë fund së fundmi.
Në një video të publikuar në TikTok, Hewitt foli hapur për lodhjen dhe presionin që po përjeton si nënë e re, ndërsa iu përgjigj kritikave për pamjen e saj.
“Nuk është kjo ajo për të cilën po mendoj tani, sepse kam një bebe për të rritur. Duhet edhe të punoj e të fitoj para, dhe po e bëj vetë, gjë që është e vështirë,” tha ajo para ndjekësve të saj.
Videoja, e shoqëruar me mbishkrimin “Prioritetet?!?!” tregonte një Hewitt të rraskapitur duke folur nga divani i saj.
Komentues të shumtë shprehën shqetësim për deklaratat e saj, ndërsa disa reagime të Hewitt thuhet se janë fshirë më pas. Një ndjekës i shkroi: “Shpresoj të mos thuash që po e përballon vetëm financiarisht… kjo do të ishte çmenduri duke marrë parasysh rrethanat.” Sipas raportimeve, Hewitt iu përgjigj shkurt: “Po”.
Megjithatë, burime pranë çiftit kanë kundërshtuar pretendimet e modeles. Një burim për Daily Mail deklaroi se Davidson mbulon të gjitha shpenzimet që lidhen me vajzën e tyre, përfshirë kujdesin ndaj fëmijës, qiranë e Hewitt dhe sigurimin shëndetësor.
“Pete mbulon çdo kosto që lidhet me Scottie-n dhe dëshiron që Elsie të jetë rehat dhe e suksesshme,” tha burimi.
Një tjetër person pranë çiftit shtoi se aktori ka bërë prioritet kohën me vajzën e tij dhe mbetet i përkushtuar si baba.
Sipas The Sun, ndarja erdhi pjesërisht për shkak të angazhimeve të shumta profesionale të Davidson, që e kanë mbajtur larg shtëpisë për periudha të gjata.
“Elsie kishte nevojë për më shumë mbështetje në shtëpi pas lindjes së vajzës,” tha një burim.
Pavarësisht ndarjes, People raportoi se dyshja ende “po përpiqen të gjejnë një rrugë” dhe janë të fokusuar tek bashkëprindërimi.
