Murtaja e bagëtive është rikthyer në qytetin e Shkodrës, e cila deri më tani ka prekur rreth 20 krerë dele të cilat janë groposur. Pas këtij rasti, me urdhër të Ministrisë së Bujqësisë fshati Mali i Gjymtit, në njësinë Dajç ka hyrë në karantinë. Rasti i cili është konfirmuar zyrtarisht prej tre ditësh, ka prekur fermën e fermerit Sokol Volaj, ku 20 krerë bagëti janë groposur dhe pritet që të asgjësohen edhe 60 të tjera. Kjo sëmundje ka shkaktuar dëme të konsiderueshme tek fermeri, si në humbje ekonomike ashtu edhe në humbjen e krerëve të bagëtisë.
Administratori i njësisë së Dajçit, Broz Pjetrani është shprehur se ekzistojnë dyshimet që murtaja e bagëtive të ketë prekur edhe bagëti të tjera të imta, për të cilat do të kryhen analizat specifike. Ndërkohë që kontrolli ka nisur edhe në zona të tjera, për të parë nëse kjo është përhapur edhe tek bagëtitë e tjera. Megjithatë, duhet theksuar se kjo sëmundje prek vetëm kafshët dhe nuk transmetohet tek njeriu.
