Grupi i punës i ekspertëve nga 27-të shtetet anëtare të BE-së i quajtur ndryshe COELA u mblodh sot në Bruksel por nuk e ka miratuar ende zyrtarisht Raportin e Vlerësimit të Përkohshëm të Standardeve (IBAR) për Shqipërinë.
Në këtë mënyrë të enjten do të ketë një përpjekje tjetër për të gjetur një konsensus me shtetet skeptike pas garancive të reja që i ka paraqitur pala shqiptare presidencës qipriote për draftin e Pozicionit të Përbashkët të BE-së sidomos në mos pengimin në vijim të punës së SPAK-ut dhe organeve të tjera të drejtësisë.
Drafti i ri që u paraqit sot si mekanizëm kompromisi nga ana e presidencës qipriote të BE ka përfshirë po ashtu më shumë kushte sa i përket luftës ndaj korrupsionit, kritereve ekonomike dhe atyre për trajtimin e pakicave kombëtare.
Në fund u vendos që gjatë ditës së enjte të vijojnë diskutimet për gjetjen e konsesusit. Në këto kushte ende raporti IBAR nuk ju ka kaluar ambasadorëve të 27 shteteve anëtare të BE-së siç pretendoi ministri Gogu.
Në rast kompromisi në nivelin e ekspertëve mbledhja më e afërt e ambasadorëve është të premten e kësaj jave.
