“Nuk ka demokraci pa liri. Nuk ka sipërmarrje pa liri. Nuk ka Europë pa liri.” Me këtë mesazh u zhvillua sot në Tiranë një takim mes profesorësh, politikanësh, sipërmarrësish dhe studentësh italianë e shqiptarë, ku në fokus ishte liberalizmi bashkëkohor, sfidat e demokracisë europiane dhe roli i arsimit në formësimin e një brezi të ri liderësh.
Gjatë aktivitetit u diskutua mbi lidhjen mes lirisë ekonomike, inovacionit dhe integrimit europian, si dhe mbi nevojën për të forcuar mendimin kritik dhe kulturën demokratike në rajon.
Takimi u përshëndet nga zëvendësministri i Ekonomisë, Enkelejd Musabelliu, presidenti i "Fondacionit Luigi Einaudi" dhe ish-senatori italian Andrea Cangini, si dhe dekani i Shkollës së Biznesit MIB në Trieste, Andrea Tracogna.
Folësit kryesorë të panelit ishin Alessandro Sterpa, profesor i asociuar i Institucioneve të së Drejtës Publike në Universitetin e Tuscia-s; Martina Dlabajová, ish-anëtare e Parlamentit Europian për grupin ALDE/Renew Europe gjatë viteve 2014–2024; si dhe Gentian Elezi, profesor rezident në Kolegjin e Europës në Tiranë dhe ish-zëvendësministër për Integrimin Europian.
Aktiviteti u zhvillua në kuadër të “Dialogëve Liberalë”, një nismë ndërkombëtare që synon të bashkojë liderë të rinj, akademikë dhe institucione nga Italia dhe Europa Juglindore për të nxitur debatin mbi sfidat e demokracisë, integrimit dhe qëndrueshmërisë politike në rajon.
Takimi u organizua nga Fondazione Luigi Einaudi, MIB School of Management dhe Observatori i Europës Juglindore.
