Gjykata e Posaçme kundër Korrupsionit dhe Krimit të Organizuar ka shpallur fajtore ish-kryetaren e komanduar të Bashkisë Tropojë, Zyra Islamaj, për akuzën e korrupsionit pasiv.
GJKKO vendosi dënimin e saj me 2 vite e 1 muaj burg, por ky dënim u pezullua dhe u konvertua në 2 vite shërbim prove, me kusht që gjatë kësaj periudhe të mos kryejë vepër tjetër penale. Gjithashtu, gjykata i hoqi të drejtën për të ushtruar funksione publike për 5 vite.
Në të njëjtën dosje, u dënua edhe ndërtuesi Rrok Gega, i cili u shpall fajtor për korrupsion aktiv. GJKKO e dënoi atë me 6 muaj burg, dënim i pezulluar dhe i konvertuar në 1 vit shërbim prove.
Sipas hetimeve të SPAK, Zyra Islamaj dyshohej se i kishte kërkuar ndërtuesit Gega ndërtimin e një ure pranë banesës së motrës së saj, një investim që nuk ishte i parashikuar në projektin fillestar.
Prokuroria e Posaçme pretendoi se ish-zyrtarja kishte ndërhyrë pranë ndërtuesit për realizimin e punimeve dhe kishte angazhuar edhe teknikun e mirëmbajtjes së rrugëve në bashki për këtë qëllim.
