A mund të krijojë njeriu ndjenja për dikë në 1 muaj?

Kiara i tha sot Luizit se i nevojitet kohë pasi nuk beson që krijohen ndjenjat për 1 muaj. Luizi nga ana tjetër dukej shumë i qartë tek ndjenjat e tij. Pas kësaj deklarate të Kiarës, është krejtësisht e natyrshme që ju të pyesni veten për afatin kohor të rënies në dashuri.

Sigurisht, çdo marrëdhënie është e ndryshme dhe nuk ka një afat kohor "të duhur" që funksionon për të gjithë. Fiziologjikisht, duhet vetëm një e pesta e sekondës që e gjithë ajo kimi e çmendur të ndizet menjëherë dhe të prodhojë atë ndjenjë dashurie, zbuloi një studim i botuar në Journal of Sexual Medicine gati një dekadë më parë.

Nga ana tjetër, ndërsa teknikisht është e mundur të përjetosh atë ndjenjë të dashurisë në më pak se një sekondë, të biesh në dashuri është ende një proces.

"Ka faza të ndryshme nëpër të cilat mund të kalojmë kur biem në dashuri, ndërtojmë lidhje dhe përfundimisht formojmë një marrëdhënie romantike", thotë Shelley Sommerfeldt, një psikologe dhe trajnere e marrëdhënieve. "Është një proces ku përjeton tërheqje fizike fillestare ndaj dikujt dhe më pas rritet në ndjenjën e një lidhjeje emocionale më të thellë dhe më të fortë."

Pra sa kohë zgjat ai proces zakonisht? Epo, varet. Burrat mendojnë të rrëfejnë dashurinë e tyre 97 ditë pasi kanë hyrë në një lidhje, ndërsa gratë nuk e mendojnë deri në 149 ditë, sipas një studimi të vitit 2011 në “Journal of Personality and Social Psychology”. Dhe përgjithësisht burrat dashurohen më shpejt se gratë, sipas një studimi të publikuar në “Evolutionary Psychology” në vitin 2010.

Psikologia beson se këto afate të përgjithshme kohore janë të sakta megjithëse ajo vëren se kjo nuk është për shkak të evolucionit apo biologjisë aq sa presioneve sociale dhe kulturore. “Ndërsa stereotipet tona ndoshta ende qëndrojnë se shumica e njerëzve besojnë se gratë janë të parat që bien në dashuri, ndjejnë një shkallë më të madhe dashurie dhe shprehin dashurinë më shpejt, hulumtimi tregon se janë burrat në marrëdhënie ata që janë të parët që bien në dashuri dhe e shfaqin atë për partneren e tyre”, shpjegon Sommerfeldt.

Por është gjithashtu e rëndësishme të shikojmë përtej binarit gjinor me këto statistika, thotë Lisa B. Schwartz, një psikoterapiste dhe terapiste seksi e certifikuar nga AASECT që u shërben klientëve në Pensilvani, Nju Xhersi dhe Florida. "Ka shumë më tepër se gjinia që shkon në shprehjen e emocioneve, veçanërisht rreth fjalës 'dashuri', thotë Schwartz.

Cilat janë disa shenja që tregojnë se jeni i dashuruar?

"Disa shenja që mund të jeni të dashuruar mund të jenë ndjenja e një dëshire të fortë për të kaluar më shumë kohë me partnerin tuaj, për të qenë i lidhur fizikisht dhe emocionalisht me të, si dhe një dëshirë e shtuar për intimitet dhe dashuri", thotë Sommerfeldt. "Shumë njerëz do të duan gjithashtu të dinë më shumë për partnerin e tyre, historitë e tyre dhe të kalurën". Nuk është për t'u habitur që dëshironi të jeni rreth personit 24/7 dhe të dëshironi të dini gjithçka për jetën e tij/saj. Sommerfeldt thotë gjithashtu se disa njerëz e vërejnë se ndihen më të lumtur në përgjithësi dhe buzëqeshin më shumë.

Si ta dini nëse jeni duke përjetuar dashuri apo infatuacion (pasion/tërheqje)?

Dashuria dhe pasioni sigurisht që kanë ngjashmëri! "Të dyja bazohen në ndjenja intensive pa menduar qartë", thotë Schwartz. Kjo mund të përkthehet në injorimin e disa "flamujve të kuq" ose idealizimin e personit, shton ajo.

Rezulton se ju mund ta dalloni vetëm nga sytë e dikujt, sipas një studimi të vitit 2014 nga Universiteti i Çikagos. Studimi zbuloi se sytë fokusohen në fytyrën e personit nëse e perceptojnë atë person si një partner të mundshëm romantik, por nëse po përjetojnë epsh, ata do të shikojnë më shumë trupin e personit. Por në fund të fundit, kjo varet nga përgjigja fiziologjike dhe thellësia e ndjenjave ndaj personit tjetër, thotë Sommerfeldt. “Infatuacioni është zakonisht një dashuri e idealizuar që mund të vijë nga një fantazi ose obsesion mbi dikë që mund të jetë i paarritshëm ose një marrëdhënie jetëshkurtër”, thotë ajo. Mund të përfshijë ndjenja të përkohshme të bazuara në admirim.

Dashuria, nga ana tjetër, përfshin njerëzit që e ndërtojnë pasionin dhe kanë një përkushtim dhe dashuri për personin tjetër. “Dashuria është të lidhesh në një nivel më të thellë dhe të duash të njohësh një person më thellësisht. Partnerët e dashuruar gjithashtu priren të ndajnë interesa dhe vlera”, shton ajo.

Dhe nëse ndiheni sikur dëshironi të përjetoni kënaqësi seksuale me dikë dhe jo domosdoshmërisht një marrëdhënie, ka të ngjarë të përjetoni epsh, shton Schwartz.

A mund të bësh dikë të dashurohet me ty?

Edhe pse nuk ka një ilaç dashurie apo truk super sekret që mund të përdorni për të bërë dikë të dashurohet me ju, mund të krijoni mundësi që i japin përparësi lidhjes. Sommerfeldt sugjeron se dashuria kërkon cenueshmëri dhe autenticitet. Nuk ka të bëjë vetëm me kalimin e kohës së bashku. Bëhet fjalë për të kaluar kohë cilësore së bashku dhe për të pasur ato biseda që ju ndihmojnë të mësoni planet e tyre të ardhshme, interesat, pëlqimet dhe mospëlqimet dhe pritshmëritë që mund të kenë për një marrëdhënie afatgjatë, thotë ajo. “Ne duhet të fokusohemi në krijimin e një lidhjeje me partnerin tonë të bazuar në besim dhe çiltërsi në vend që të detyrojmë ndjenjat”, thotë Sommerfeldt.

Burimi: Women's Health Përshtati: xing.al