Një person ka humbur jetën paraditen e kësaj të premteje, pasi u përplas nga një furgon në aksin kombëtar Peqin–Elbasan. Aksidenti ndodhi rreth orës 10:00 në fshatin Përparim. Sipas informacioneve paraprake, viktima, identiteti i të cilit ende nuk është bërë i ditur, u godit nga furgoni gjatë lëvizjes në këtë segment rrugor. Për shkak të plagëve të rënda, ai ndërroi jetë në vendngjarje.
Menjëherë pas aksidentit, në vendngjarje mbërritën shërbimet e Policisë dhe grupi hetimor, të cilët nisën veprimet për zbardhjen e rrethanave të ngjarjes. Ndërkohë, po punohet për identifikimin e viktimës dhe përcaktimin e dinamikës së aksidentit. Policia pritet të japë më shumë detaje pas përfundimit të hetimeve paraprake.
