Breshëri goditi disa prej zonave bujqësore të Korçës, duke shkaktuar dëme të konsiderueshme në sipërfaqet e mbjella me perime. Humbjet për fermerët, vetëm pak javë para nisjes së sezonit të vjeljes, janë të mëdha. Në fshatrat Lumalas, Biranj, Melçan dhe Vashmi, breshëri goditi kryesisht parcelat me speca dhe spinaq. Sipas fermerëve, në disa prej sipërfaqeve dëmet arrijnë deri në 60% të prodhimit. Edhe kultura të tjera bujqësore janë dëmtuar, duke rritur faturën e humbjeve për fermerët e fushës së Korçës.
Prodhimet që kanë mbetur të dëmtuara po shiten me vështirësi dhe në disa raste nën kosto, ndërsa një pjesë e perimeve po kalbet nëpër parcela, pasi nuk po gjen treg. Fermerët e juglindjes po përballen gjithnjë e më shpesh me pasojat e ndryshimeve klimatike dhe fenomeneve ekstreme të motit, të cilat po ndikojnë drejtpërdrejt në prodhimin bujqësor dhe të ardhurat e tyre. Situata po shton nevojën për masa më të mëdha mbrojtëse dhe për përshtatjen e bujqësisë ndaj kushteve gjithnjë e më të paparashikueshme të motit.
