Vazhdojnë kërkimet për Luigi Cavallari, bashkëshortin e ministres italiane për Familjen, Lindshmërinë dhe Mundësitë e Barabarta, Eugenia Roccella. Ai rezulton i zhdukur që nga ora 18:00 e së shtunës, 27 qershor, në ujërat e Liqenit Vico, në zonën e Viterbos.
Ata ishin duke kaluar një pasdite relaksi dhe kishin marrë një barkë për të lundruar. 84-vjeçari hyri në ujë për t’u freskuar, por pasi u pa të dilte një herë në sipërfaqe, më pas humbi nga shikimi. Nuk është e qartë nëse ai pësoi ndonjë problem shëndetësor apo ndodhi ndonjë incident në ujë. E paqartë është edhe nëse ai hyri vetë në ujë apo u rrëzua nga varka. Hetuesit kryen gjithashtu inspektime të varkës së vogël ku ndodhej çifti.
Njësitë speciale të zhytjes nga Departamenti i Zjarrfikësve të Napolit mbërritën në vendngjarje gjatë natës dhe mëngjesin e së dielës, rreth orës 6:00 të mëngjesit. Operacionet vazhduan gjatë gjithë ditës me kërkime vizuale dhe instrumentale, duke përdorur ROV (Automjete me telekomandë), sonda të pajisura me kamera dhe kamera me imazhe termike.
Ishte vetë ministrja që dha alarmin dje pasdite, rreth orës 17:30 duke aktivizuar ekipet e shpëtimit. Ekspertët po e kërkojnë me kujdes liqenin, por deri më tani nuk ka asnjë shenjë të tij. Ngjarja ndodhi vetëm pak metra larg nga shumë notarë që kishin vendosur të kalonin pasditen e së shtunës në liqen. Pasi u nxor në breg, ministrja Eugenia Roccella u dërgua në shtëpi në provincën e Viterbos, ndërsa kërkimet vazhdojnë.
