Pak ditë para çerekfinales së parë në historinë e saj në Kupën e Botës, Norvegjia po përballet me një gjendje gripale që po vështirëson përgatitjet për ndeshjen kundër Anglisë. Kombëtarja norvegjeze po has probleme shëndetësore dhe vetë trajneri Ståle Solbakken u paraqit në konferencën për shtyp disa ditë më parë duke kollitur, ndërsa konfirmoi se disa pjesëtarë të ekipit janë prekur nga gripi.
Simptomat kanë prekur disa persona, të cilët prej ditësh ankohen për kollë, vështirësi në frymëmarrje dhe gjendje të përgjithshme plogështie. Vetëm Jørgen është ndalur nga temperatura, siç pranoi trajneri për gazetën norvegjeze Dagbladet. Edhe para ndeshjes me Brazilin disa lojtarë ndiheshin të dobët, por tani situata është përhapur më tej, megjithëse mbetet plotësisht nën kontrollin e stafit mjekësor.
Kollë dhe temperaturë në grumbullimin e Norvegjisë
Njëfarë shqetësimi ka përfshirë delegacionin norvegjez, që po përgatitet për çerekfinalen e parë të një Botërori në historinë e vendit, pa qenë në gjendjen më të mirë fizike. Disa futbollistë kanë shfaqur simptoma gripale, si kollë dhe dobësi të përgjithshme. Ata duket se janë lodhur nga udhëtimet e shumta të ditëve të fundit dhe tani po përballen me një grip që ka dobësuar një pjesë të mirë të skuadrës. Stafi mjekësor është në gatishmëri, por sipas trajnerit bëhet fjalë vetëm për lodhje të përkohshme të shkaktuar nga udhëtimet e gjata dhe transferimet.
Solbakken, i cili edhe në konferencën për shtyp të disa ditëve më parë kollitej vazhdimisht, bëri një përditësim të situatës: “Vetëm Jørgen pati temperaturë, ndërsa të tjerët kanë pasur kollë dhe ngjirje zëri aty-këtu. Por kemi kondicionerët, fluturimet, dhomat e zhveshjes dhe gjithë pjesën tjetër. Jemi më shumë se 50 persona, ndaj do të ishte e çuditshme që askush të mos sëmurej.”
Disa lojtarë janë ankuar për kollë dhe vështirësi në frymëmarrje, por vetëm njëri ka pasur temperaturë. Për momentin situata mbetet nën kontroll dhe asnjë nga titullarët nuk konsiderohet në rrezik, edhe pse gjendja fizike e skuadrës nuk është optimale. Të shtunën Norvegjia do të përballet me Anglinë në çerekfinale, me shpresën se do ta lërë pas këtë grip pas mbërritjes në Majami, ku do të ketë tre ditë në dispozicion për t’u rikuperuar dhe për t’u përgatitur sa më mirë.
