Beteja ligjore mes Blake Lively dhe Justin Baldoni duket se nuk ka përfunduar ende. Ish-bashkëpunëtorët në filmin “It Ends With Us” do të përballen sërish në gjykatë, ndërsa aktorja po kërkon dëmshpërblime pas rrëzimit të padisë prej 400 milionë dollarësh që Baldoni kishte ngritur kundër saj.
Sipas dokumenteve gjyqësore, Lively kërkon që Baldoni të mbulojë shpenzimet e saj ligjore dhe kostot gjyqësore të lidhura me padinë për shpifje. Përveç kësaj, ajo po kërkon edhe dëmshpërblime shtesë dhe ndëshkuese, të cilat mund të arrijnë në shuma të konsiderueshme.
Përplasja e re ligjore vjen pas muajsh tensionesh mes dy aktorëve, të cilët bashkëpunuan në filmin “It Ends With Us”, i publikuar në vitin 2024. Konflikti nisi pasi Lively akuzoi Baldoni-n për ngacmim seksual dhe për organizimin e një fushate diskredituese kundër saj.
Në muajin prill, një gjykatë hodhi poshtë shumicën e pretendimeve të ngritura nga Lively, përfshirë edhe akuzat për ngacmim seksual. Pak javë më vonë, palët arritën një marrëveshje, pa shkëmbim financiar mes tyre.
Megjithatë, çështja nuk u mbyll plotësisht. Tashmë Lively po mbështetet në një ligj të Kalifornisë, miratuar në vitin 2023 në kuadër të lëvizjes #MeToo, i cili synon të mbrojë personat që raportojnë sjellje të papërshtatshme seksuale nga paditë hakmarrëse për shpifje.
Justin Baldoni kishte ngritur një padi prej 400 milionë dollarësh kundër Lively, bashkëshortit të saj Ryan Reynolds dhe gazetës The New York Times, duke pretenduar se akuzat ndaj tij ishin të pavërteta dhe dëmtuan reputacionin e tij. Megjithatë, gjykata e rrëzoi çështjen duke argumentuar se deklaratat e Lively ishin të mbrojtura ligjërisht.
Avokati i aktores, Michael Gottlieb, argumenton se ligji parashikon sanksione të forta ndaj personave që paraqesin padi të pasuksesshme hakmarrëse kundër atyre që raportojnë ngacmime seksuale.
Seanca e radhës pritet të zhvillohet në një gjykatë federale në Manhattan, ku secila palë do të ketë vetëm 30 minuta për të paraqitur argumentet e saj.
