"A mund të merreni me këtë idiot siç duhet?”, i kërkon Liga e Kafshëve të Francës Presidentit të Shqipërisë.
Videoja ku influenceri dhe ish-reperi Mortadon shihet duke goditur një qen vazhdon të shkaktojë reagime të forta në rrjetet sociale. Më 25 korrik, ai u filmua gjatë pushimeve në Shqipëri, në një video të publikuar në TikTok. Në pamje shihet teksa i jep një grusht një qeni, i cili nuk duket se paraqet ndonjë kërcënim. Goditja e detyron kafshën të largohet me vrap dhe ka ngjallur zemërimin e mijëra përdoruesve të rrjeteve sociale, si edhe të organizatave për mbrojtjen e kafshëve.
Nga ana e saj, Konfederata Kombëtare për Mbrojtjen e Kafshëve (CNDA), që bashkon 270 shoqata dhe strehëza për kafshët, ka njoftuar se do të depozitojë një kallëzim penal ndaj të riut për keqtrajtim të kafshëve.
“Nuk do ta lë të na sulmojë”
Pamjet e agresionit, të publikuara fillimisht në TikTok, janë shpërndarë gjerësisht në rrjetet sociale, veçanërisht pasi media Brut i publikoi të hënën, më 27 korrik 2026.
CNDA e dënoi “me vendosmërinë më të madhe këtë sjellje të papranueshme dhe në kundërshtim me vlerat më elementare të respektit dhe mbrojtjes që u detyrohemi kafshëve. Asnjë kontekst, asnjë rrethanë dhe asnjë gjendje dehjeje nuk mund të justifikojë që një kafshë, e cila dukshëm nuk ishte agresive, të bëhet viktimë e dhunës”, thuhet në deklaratën e publikuar në faqen zyrtare të organizatës.
Në videon që shkaktoi polemika, shkruhet se influenceri dhe miqtë e tij ishin të dehur (“khapta”). Pamjet tregojnë Mortadon duke goditur me grushte një qeni që ndodhej i shtrirë në shpinë.
Pas reagimeve të shumta që dënonin veprimin e tij, influenceri reagoi në Snapchat.
“Nuk do ta lë të na sulmojë (…) i dhashë një grusht që të largohej, që të na linte rehat”, u justifikua ai.
Më tej shtoi: “Është e vërtetë që, kur e shoh videon, është tronditëse. Nuk duhej ta kisha bërë këtë (…) por vëlla, nuk do ta lë të na kafshojë.”
Ndërkohë, është nisur edhe një peticion, i cili deri më 28 korrik ka mbledhur mbi 20 mijë firma.
“Drejtësi për këtë qen të gjorë, që u godit me grusht nga një influencer!”, kërkon Lou, autorja e peticionit./ LeParisien
