Eliminimi i parakohshëm i Turqisë nga Botërori 2026 ka shkaktuar një valë të fortë polemikash në vend. Pritshmëritë ishin krejt ndryshe, sidomos duke pasur parasysh se formati i ri i turneut u jepte skuadrave mundësinë të kualifikoheshin në fazën e 1/16-ave edhe si një nga kombëtaret më të mira të renditura në vendin e tretë. Në vend të kësaj, kombëtarja turke u detyrua të largohej që në përfundim të fazës së grupeve.
Në qendër të kritikave u gjend edhe trajneri Vincenzo Montella, por presidenti i Federatës Turke të Futbollit, Ibrahim Hacıosmanoğlu, përjashtoi çdo mundësi për ndryshim në pankinë. "Do të qëndrojë në detyrë dhe jam i bindur se, po ta kishim kaluar fazën e grupeve, do të kishim mundur të ecnim edhe më tej", deklaroi ai.
Kreu i futbollit turk hodhi poshtë gjithashtu zërat se Hakan Çalhanoğlu kishte pasur ndikim të tepruar në vendimet teknike të trajnerit. Gjatë javëve të fundit kishin qarkulluar raportime për tensione të pretenduara brenda ekipit, përfshirë edhe një përplasje të ashpër mes Çalhanoğlu dhe Orkun Kökçü gjatë grumbullimit të kombëtares, episod që, sipas këtyre raportimeve, kishte ngritur pikëpyetje mbi autoritetin e Montellës. Megjithatë, Federata vazhdon t'i mohojë këto pretendime.
Shpërblimi që ka shkaktuar zemërimin e tifozëve
Ajo që ka nxitur edhe më shumë debat është vendimi për të mbajtur premtimin e bërë ndaj futbollistëve gjatë fushatës kualifikuese: dhënia e vilave luksoze. Ky vendim ka shkaktuar kritika të shumta nga opinioni publik, veçanërisht pas paraqitjes zhgënjyese në Botëror.
Megjithatë, Hacıosmanoğlu nuk ka ndërmend të tërhiqet. "Do t'ua jap patjetër ato shtëpi futbollistëve, ashtu siç kam premtuar", deklaroi ai, duke shpjeguar se projekti ndërtimor disponon të gjitha lejet e nevojshme dhe se nuk do të realizohet në një zonë të mbrojtur për vlera historike apo arkeologjike.
Presidenti i Federatës kujtoi se Turqia ka përfituar 14 milionë dollarë nga FIFA për pjesëmarrjen në Botëror dhe se shpërblimi financiar, i plotësuar me fonde shtesë nga Federata, është shpërndarë në mënyrë të barabartë mes të gjithë futbollistëve të grumbulluar gjatë fushatës kualifikuese.
Vilat do të ndërtohen në Gjirin piktoresk të Mandalyas, në Gjirin e Güllükut, mes distrikteve Milas dhe Bodrum, një nga zonat më të njohura të bregdetit egje turk, e famshme për detin e kristaltë, trashëgiminë arkeologjike dhe turizmin detar. Megjithatë, kjo zgjedhje vazhdon të ushqejë debatin në një vend që ende nuk e ka kapërcyer zhgënjimin e Botërorit.
