Një video e rëndë dhe e pazakontë është publikuar nga gazetari Osman Stafa, ku shfaqen efektivë të Policisë së Kuçovës duke tërhequr zvarrë një qytetar, ndërsa e gjithë skena zhvillohet në praninë e një fëmije të mitur që qan dhe u lutet policëve të ndalojnë.
"Krimi" që kishte bërë banori i një prej fshatrave të Kuçovës ishte se kishte suvatuar pa leje murin e shtëpisë.
Pamjet tregojnë momentin kur policët hyjnë në banesë dhe ndërhyjnë me forcë për ta marrë qytetarin. Ai tërhiqet zvarrë nga efektivët, ndërsa pranë tyre ndodhet fëmija, i cili shpërthen në të qara dhe u lutet vazhdimisht që të ndalojnë.
“O xhaxhi polic, o xhaxhi polic, të lutem…”, dëgjohet të thotë i mituri, ndërsa efektivët vazhdojnë të tërheqin kryefamiljarin. Pamjet janë publikuar edhe nga avokati Kujtim Cakrani që pyet: Më thoni nëse ndonjë pushtues që ka ardhur në këto anë është sjell kështu me shqiptarët?
