Vigjilja surreale e finales Spanjë-Argjentinë: vetëm njëra nga dy kombëtaret arriti të stërvitej

Vigjilja e finales së Botërorit mes Spanjës dhe Argjentinës u ndikua ndjeshëm nga kushtet e pafavorshme atmosferike. Një stuhi goditi zonën mes Nju Jorkut dhe Nju Xhersit, duke përmbysur të gjithë programin e stërvitjes së fundit të të dy skuadrave. Dy trajnerët ishin duke bërë zgjedhjet e fundit të formacionit dhe kishin nevojë pikërisht për seancën e fundit për të zgjidhur çdo dilemë. Por moti i keq dhe stuhia ndryshuan gjithçka. Si Argjentina ashtu edhe Spanja nuk mundën të stërviteshin për shkak të kushteve atmosferike, duke respektuar protokollin shumë të rreptë që zbatohet në Shtetet e Bashkuara në raste të tilla: “Seek Cover Protocol”, i cili detyron pezullimin e çdo aktiviteti për të garantuar strehim të sigurt, duke evakuuar fushën dhe tribunat.

Ky protokoll, që vlen si për ngjarjet sportive ashtu edhe për ato jo sportive, mbetet në fuqi derisa të mos ketë më rrufe për të paktën 30 minuta. Kështu gjithçka shtyhet edhe me një gjysmë ore tjetër, pa afat të caktuar. Kjo ndodhi veçanërisht me Spanjën, e cila në fund u detyrua të stërvitej në ambiente të mbyllura, pa mundur të zbresë në fushë 24 orë para fillimit të finales së Botërorit. Vetëm Argjentina, falë edhe këmbënguljes së Scalonit, arriti të zhvillonte një seancë në fushë.

Scaloni, siç thekson Sky, këmbënguli personalisht për të gjetur një hapësirë kohore të lirë dhe për t’u stërvitur pavarësisht motit të keq. Seanca e planifikuar u shty me dy orë, derisa trajneri i Argjentinës arriti ta nxirrte skuadrën në fushë për një stërvitje të plotë, gjë që nuk kishte mundur ta bënte më parë përpara finales. Megjithatë, duhet thënë se edhe Argjentina u kufizua shumë.

Fillimisht nga vonesa e fluturimit për shkak të stuhisë dhe më pas dje nga një seancë shumë e shkurtër, për t’u dhënë mundësi lojtarëve të merrnin pjesë në aktivitetet e planifikuara për median. Për më tepër, sot, në ditën e fundit të përgatitjeve për finalen e Botërorit dhe të vendimeve të fundit për formacionin, Scaloni kishte nevojë të provonte disa variante në fushë. Argjentina qëndroi e bllokuar për dy orë në palestër, në një atmosferë surreale, dhe vetëm në fund lojtarët arritën të stërviteshin, ndryshe nga Spanja, e cila do të paraqitet në finale pa zhvilluar stërvitjen e fundit në fushë.