Protesta kundër projektit turistik në zonën e mbrojtur të Zvërnecit hyn sot në ditën e saj të gjashtë. Qytetarë nga zona të ndryshme të vendit kanë paralajmëruar pjesëmarrje në tubimin që do të zhvillohet në Tiranë, ku krahas kundërshtimit ndaj projektit, kërkojnë largimin e kryeministrit Edi Rama.
Tubimi pritet të nisë në orën 18:00 në sheshin “Skënderbej”, për t’u zhvendosur më pas para godinës së Kryeministrisë. Organizatorët kanë bërë thirrje për pjesëmarrje masive, duke e cilësuar protestën si një reagim qytetar në mbrojtje të interesit publik dhe mjedisit. Prej pesë ditësh, bulevardi kryesor i kryeqytetit është kthyer në qendrën e protestave, ku qytetarët kanë shprehur kundërshtimin e tyre përmes pankartave, marshimeve dhe thirrjeve drejtuar qeverisë.
Një ditë më parë, protestuesit paraqitën pesë kërkesa që i konsiderojnë të panegociueshme: dorëheqjen e qeverisë, shfuqizimin e statusit të investitorit strategjik, anulimin e Paketës së Maleve, si dhe shfuqizimin e ndryshimeve në ligjin për zonat e mbrojtura dhe në ligjin për trashëgiminë kulturore.
