Prokuroria e Korçës ka ngritur katër akuza ndaj Violand Braçellarit dhe ka kërkuar lënien në fuqi të masës së sigurisë “Arrest në burg”, kërkesë që u pranua nga gjykata. Ai dyshohet për vrasjen e efektivit të policisë Enea Mekolli, plagosjen e një efektivi tjetër, si dhe për armëmbajtje pa leje.
Sipas hetimeve, ngjarja ndodhi më 4 qershor në Malin e Bodesë, gjatë një operacioni për kapjen e Bracellarit, i cili ishte në kërkim dhe i dënuar me 10 vite burg për trafik narkotikësh. Gjatë ndërhyrjes, ai hapi zjarr ndaj forcave të policisë.
Si pasojë e të shtënave humbi jetën efektivi Enea Mekolli, ndërsa u plagos në kokë efektivi Edison Adri. Prokuroria thotë se Bracellari vijoi të qëllonte edhe pse policët ishin të identifikuar me uniforma dhe i bënin thirrje të dorëzohej.
Organi i akuzës vlerëson se i dyshuari paraqet rrezikshmëri të lartë shoqërore dhe se prej vitesh i ishte shmangur drejtësisë. Ndërkohë, po hetohen edhe dyshime për “Shpërdorim detyre” lidhur me organizimin dhe drejtimin e operacionit policor.
