Zjarri që shpërtheu disa orë më parë në zonën e lagjes Frizë, pranë ish-Azotikut në Fier, është përhapur me shpejtësi për shkak të erës së fortë, duke marrë përmasa edhe më të mëdha.
Flakët kanë avancuar deri pranë rrugës që lidh Qafa e Koshovicës dhe Kreshpan, duke rrezikuar një depo uji, si edhe një lokal që ndodhet buzë kësaj rruge.
Për shkak të situatës së rënduar është kërkuar ndërhyrja nga ajri. Një helikopter ka mbërritur në zonë dhe ka nisur operacionin për shuarjen e flakëve, ndërsa nga toka vijojnë përpjekjet intensive të forcave zjarrfikëse.
Në operacion janë angazhuar shërbimet zjarrfikëse, efektivë të Policisë së Shtetit, si dhe dhjetëra banorë të zonës, të cilët po punojnë për të izoluar vatrën e zjarrit dhe për të parandaluar përhapjen e mëtejshme të flakëve.
Autoritetet u bëjnë thirrje qytetarëve të shmangin lëvizjet në zonën e prekur dhe t'u hapin rrugë mjeteve të emergjencës, ndërsa operacioni për vënien nën kontroll të zjarrit vijon.
