Një vatër zjarri ka përfshirë një sipërfaqe pyjore në fshatin Derstil, në Qendrën Administrative Gjinar, në Elbasan. Flakët janë përhapur masivisht, duke krijuar rrezik për banesat dhe bizneset pranë zonës. Dyshohet se flakët kanë nisur pranë një grumbulli mbetjesh dhe të favorizuara nga kushtet e terrenit dhe përhapja e shpejtë e zjarrit, janë shtrirë në një sipërfaqe të konsiderueshme me bimësi.
Situata është bërë veçanërisht shqetësuese pasi zjarri është afruar me një banesë, ku në ato momente ndodhej një e moshuar. Flakët kanë rrezikuar gjithashtu edhe një biznes që ndodhet pranë zonës së përfshirë nga zjarri. Përballë përhapjes së flakëve, banorët e zonës kanë ndërhyrë fillimisht për të frenuar zjarrin dhe për të mbrojtur pronat pranë vatrës. Më pas, në vendngjarje kanë mbërritur forcat zjarrfikëse, të cilat kanë vijuar ndërhyrjen për izolimin e zjarrit.
