Në fillim të gushtit, një violinist profesionist, anëtar i Orkestrës Simfonike Burgundy-Franche-Comté, u arrestua pranë kufirit franko-italian me 38.3 kilogramë kokainë të fshehur në makinën e tij. Të premten, gjykata penale e Nicës e dënoi Beng Bakallin me 3 vjet burg dhe një gjobë të majme prej 1.1 milionë eurosh.
Vepra penale që ai u akuzua ishte blerje, posedim dhe transportim i narkotikëve, si dhe pastrim i parave dhe posedim i paligjshëm i armëve. Babai i 4 fëmijëve ishte pa precedentë të mëparshëm penalë. Prokuroria kishte kërkuar një dënim me 6 vjet burg.
Ngjarjet datojnë që nga 10 gushti, kur në pikën e pagesës La Turbie, oficerët e doganës ndaluan një Citroën C5 Aircross të drejtuar nga një burrë, një violinist profesionist. Nën tapetin e makinës, ata zbuluan një sasi të madhe droge, konkretisht 38.33 kilogramë kokainë, ekuivalente me pak më shumë se 1 milion euro në rrugë.
Por kjo nuk është e gjitha. Kur muzikanti ishte në paraburgim policor në Nisë, hetuesit kontrolluan shtëpinë e tij në Besançon, ku sekuestruan 90,000 euro në para të gatshme dhe zbuluan 4 armë zjarri të kategorisë B dhe C dhe një sasi të madhe municionesh.
Lidhur me shumën e madhe të parave të gatshme, i dyshuari pretendoi se ishte një dhuratë nga babai i tij, Hasan Bakalli, gjithashtu violinist, dhe, sa u përket posedimit të armëve dhe municioneve, se ai ushtronte qitje sportive.
“Nuk mund ta shpjegoj se si munda të përfundoja këtu”, - tha ai gjatë seancës dëgjimore. 45-vjeçari, i lindur në Shqipëri dhe banues në Francë që nga viti 1991, është një violinist profesionist që ka studiuar në disa konservatore në Francë (Lyon, Dijon, Besançon) dhe është anëtar me ndërprerje i orkestrës simfonike Victor-Hugo Bourgogne-Franche-Comté (OVH). ©LAPSI.al
