Kanë dalë detaje të reja nga operacioni i policisë dhe prokurorisë i zhvilluar mbrëmjen e së hënës në Sarandë dhe Ksamil kundër ndërtimeve pa leje.
Mediat raportojnë se Prokuroria e Sarandës ka firmosur 11 masa sigurie, nga të cilat 3 janë për efektivë të policisë ndërsa të tjerat janë për biznesmenë dhe zyrtarë.
Deri më tani në pranga kanë rënë dy persona, Kristofor Shkrepa, specialit i policisë në Ksamil dhe Alqi Papa, pronar i hotel ‘Oasis’ në Saransë. Sipas të njëjtave burime, në këtë hotel, ishte ndërtuar pa leje një kat mbi tarracën e objektit 6-katësh në rrugën “Butrinti” në lagjen nr.1.
Mësohet, se masë sigurie është lëshuar dhe Arjola Dhramin dhe Xhaferr Bajon, pronarë të beach-barit ‘Copacabana’ në Ksamil që u shemb së fundmi nga IKMT pasi nuk dispononte leje përkatëse. Ishte pikërisht ky beach-bar që çoi në shkarkimin e kupolës drejtuese të Komisariatit të Sarandës për shkak se objekti ishte ngritur pa leje në këmbim të ryshfeteve. /LAPSI.al
