Një dokument i ri që lidhet me Valon Ademin, biznesmenin nga Kosova që pretendon se ka 49% të aksioneve të Aeroportit të Vlorës hedh dritë mbi një nga pikëpyetjet më të mëdha të betejës për koncensionin dhe nxjerr në pah një kontradiktë të fortë në qëndrimin e tij.
Nga ky dokument rezulton se përpara se të pretendonte 47% të aksioneve të MABCO-s, ai kishte hequr dorë shprehimisht nga mundësia për të blerë 40% të aksioneve të YDA-së në të njëjtën kompani.
Dokumenti konfirmon se Ademi hoqi dorë në mënyrë të parevokueshme nga ushtrimi i opsionit për blerjen e kuotave të kompanisë turke, YDA në “Vlora International Airport” siç tregohet më poshtë:
Pas kësaj deklarate të firmosur nga vetë biznesmeni, nuk kuptohet se pse Valon Ademi, që nuk i donte 40% të aeroportit kur ia ofronte mekanizmi ekzistues, u shfaq më vonë si pronar i pretenduar i 47% të aksioneve të MABCO-s?
Në fakt, pas largimit të turqve të YDA-së, ishte MABCO që mori 98% të kompanisë Vlora International Airport dhe mbi të ra pesha kryesore e financimit të projektit. Aeroporti ndërkohë mori formë, u ndërtua terminali dhe projekti fitoi një vlerë krejt tjetër nga ajo që kishte në momentin e largimit të kompanisë turke.
Vetëm se në prill të vitit 2025, pasi MABCO kishte siguruar financimin dhe kishte lënë kolateral pronat e saj, Valon Ademi u shfaq me pretendimin se kishte fituar 47% të kuotave të MABCO-s, duke kaluar nga 2% në 49% të aksioneve. Pikërisht ky transferim është në zemër të konfliktit që shpërtheu më pas për kontrollin e aeroportit.
Por dokumenti që publikohet sot paraqet një kontradiktë gjithnjë e më të vështirë për t’u shpjeguar si rastësi. Shpjegimi i kësaj situate mund të shkojë më tej. Mund të shpjegojë se ku nisi realisht operacioni që përfundoi me MABCO-n jashtë kontrollit të Aeroportit të Vlorës dhe me shtetin shqiptar përballë saj në arbitrazh ndërkombëtar.
