Agjencia Kombëtare e Krimit në Mbretërinë e Bashkuar (NCA) ka goditur një rrjet ndërkombëtar të dyshuar për drogim dhe abuzim seksual ndaj grave, duke arrestuar tetë persona gjatë një operacioni të gjerë që po zhvillohet në bashkëpunim me autoritetet e vendeve të tjera.
Sipas NCA-së, anëtarët e rrjetit organizonin dhe koordinonin sulme seksuale ndaj grave që ishin pa ndjenja pas përdorimit të substancave narkotike.
Aktiviteti kriminal zhvillohej përmes një forumi online, ku pjesëmarrësit shkëmbenin informacione dhe planifikonin abuzimet .
Hetimi nisi në vitin 2025, pasi një investigim gazetaresk në Gjermani zbuloi ekzistencën e forumit ku diskutoheshin dhe organizoheshin këto krime. Autoritetet britanike bëjnë të ditur se rrjeti kishte shtrirje globale, me anëtarë të identifikuar në dhjetëra shtete në të gjitha kontinentet.
Deri tani janë identifikuar mbi 270 persona të lidhur me platformën, ndërsa emrat e tyre nuk janë bërë publikë për shkak të hetimeve në vazhdim. Përveç tetë arrestimeve në Britani, janë hapur edhe 14 hetime të tjera, si në Mbretërinë e Bashkuar ashtu edhe në vende të tjera, në bashkëpunim me partnerët ndërkombëtarë.
Zëvendësdrejtori i NCA-së, Nigel Leary, tha se sulmet seksuale të kryera me përdorimin e drogës nuk janë më raste të izoluara, por po shfaqen gjithnjë e më shumë si krime të organizuara dhe të koordinuara përmes platformave dixhitale.
Rasti ka sjellë në vëmendje ngjashmëri me çështjen që tronditi Francën, ku Gisèle Pélicot u abuzua seksualisht për vite me radhë pasi drogohej nga ish-bashkëshorti i saj, i cili ftonte persona të tjerë të merrnin pjesë në krime. Pas atij rasti, autoritetet në disa vende evropiane kanë intensifikuar hetimet ndaj rrjeteve të ngjashme që veprojnë në internet.
