Ngjarja e rëndë e ekzekutimit të Viktor Bardhit në Mirditë mëngjesin e sotëm ka tronditur opinionin publik. Drejtori i Policicë së Lezhës, Ermal Muçaj ka sjellë detaje të reja në lidhje me vrasjen e këtij të fundit.
Ai ka bërë me dije se deri më tani është shoqëruar një person identiteti i të cilit nuk do të bëhet publik në këtë fazë të hetimeve. Ai njofton se po kryhen të gjitha hetimet në lidhje me ngjarjen dhe se në makinë nuk është gjetur asnjë armë zjarri.
“Për momentin kemi një të shoqëruar dhe një pistë hetimi.Rreth orës 8:55 sot jemi njoftuar në sallën operative për një ngjarje të rëndë të ndodhur në Ndërfushas, Mirditë. Kemi ngritur grupin hetimor, kemi ardhur në vendngjarje dhe nga veprimet e para hetimore ka rezultuar që një shtetas që është vrarë në automjetin e tij është shtetasi Viktor Marku, ditëlindja 1961.
Ndërkohë që jeni dhe vetë prezent po bëhen të gjitha veprimet hetimore. Rreth 20 minuta pas ngjarjes, në fshatin Rrethi i Ri që është afër Rubikut, diku këtu afër, është djegur një automjet. Është ngritur dhe grupi hetimor i dytë dhe po sqaron rrethanat e rastit. Po kryhen të gjitha veprimet hetimore, po fiksohen të gjitha provat, po pyeten dëshmitarët edhe do të jemi për një njoftim të dytë sapo të kemi diçka të re në lidhje me këtë ngjarje. Kemi të shoqëruar dhe pistat tona i kemi, por nuk mund t’i ndajmë në këtë moment me mediat. Jo, nuk janë gjetur armë në makinë.”, tha drejtori i policisë.
