Kryebashkiaku i arrestuar i Tiranës, Erion Veliaj, është shtruar mesditën e sotme në një spital privat në kryeqytet.
Burime bëjnë me dije se Veliaj ka dalë nga qelia në burgun e Durrësit dhe është transportuar me ambulancë drejt spitalit privat .
Nuk dihen ende arsyet e shtrimit të tij dhe nëse bëhet fjalë për një problem shëndetësor apo për një vizitë të planifikuar. Po ashtu, mbetet e paqartë nëse qëndrimi në spital lidhet me përpjekjet e tij për ndryshimin e masës së sigurisë “arrest me burg”.
Veliaj ka kërkuar në disa shkallë të gjyqësorit ndryshimin e masës së sigurisë, por kërkesat e tij nuk janë pranuar dhe ai vijon të qëndrojë në paraburgim.
Kjo nuk është hera e parë që kryebashkiaku i Tiranës dërgohet në një spital privat. Disa muaj më parë, ai iu nënshtrua një ndërhyrjeje për heqjen e lythave dhe, pas disa orësh, u rikthye në qeli i shoqëruar nga forca të shumta policie.
