Padoku i Formula One është kthyer në një fuçi baruti dhe në qendër të stuhisë ndodhet Max Verstappen. Piloti i Red Bull Racing, kritik që prej fillimit të sezonit ndaj rregulloreve të reja teknike, ka vendosur një vijë të kuqe për të ardhmen e tij, duke kërcënuar hapur me tërheqje nëse Federata Ndërkombëtare do të shtyjë për në vitin 2028 ndryshimet e pritura në rregulloren e “power unit”. Frustrimi i katër herë kampionit të botës shpërtheu gjatë fundjavës së Çmimit të Madh të Kanadasë, kur pas vendit të gjashtë në kualifikuese, Verstappen shpërtheu ashpër kundër një Formula 1 të reduktuar, sipas tij, në menaxhim të pjesës elektrike, mes “lift and coast” dhe baterive për t’u karikuar, duke sakrifikuar drejtimin në limit dhe shpirtin më të pastër të motorsportit.
Nga lindi gjithçka: përçarja politike mbi formulën 60:40
Thelbi i debatit lidhet me gjeneratën e ardhshme të motorëve, e planifikuar për vitin 2027. Plani origjinal i FIA-s, i njoftuar më 8 maj, parashikonte ndryshimin e raportit aktual energjetik (sot 50:50 mes motorit me djegie të brendshme dhe pjesës elektrike), duke e çuar në 60:40 në favor të motorit me djegie. Ajo që dukej si një formalitet për t’u miratuar nga Këshilli Botëror i Motorsportit, u shndërrua në një luftë të vërtetë politike që përçau padokun: në njërën anë Ferrari, Honda dhe Audi kundër ndryshimit, në anën tjetër Mercedes dhe Red Bull pro.
Arsyet e “jo”-s lidhen me kostot shtesë për ridizenjimin e “power unit”-eve aktuale (duke garantuar një fluks më të madh karburanti), nevojën për disa skuadra që të modifikojnë shasinë për të akomoduar rezervuarë më të mëdhenj dhe, mbi të gjitha, zhvillimin teknologjik. Një ndryshim rregullash në 2027 do të anulonte avantazhet konkurruese të fituara tashmë nga ata që janë më përpara në zhvillim me parametrat aktualë (të lidhur edhe me mekanizmin ADUO), ndaj ekziston rreziku konkret që propozimi të shtyhet përfundimisht në 2028.
You can clearly see the disappointment on Max Verstappen’s face.
— MV33Racing🏎 (@MV33Racing) May 23, 2026
Even so, it’s great to see him still taking the time to thank the fans 🧡pic.twitter.com/xIj2xYXzOX
Ultimatumi i Verstappen: “Mendërisht e papërballueshme”
Një skenar që ka shkaktuar zemërimin e kampionit holandez, i cili vetëm pak orë më parë ishte shprehur i gatshëm të qëndronte edhe në 2027 me kusht që FIA “ta mbante fjalën”, por që menjëherë pas kualifikueseve u tregua kategorik: “Nëse gjërat mbeten kështu, sezoni i ardhshëm do të jetë shumë i gjatë dhe i vështirë, diçka që nuk e dua. Mund t’ju them se, mendërisht, për mua nuk është e qëndrueshme të vazhdoj në këtë mënyrë edhe një vit tjetër. Absolutisht jo.” Kur u pyet nëse alternativa mund të ishte një vit sabatik në pritje të vitit 2028, piloti mbylli çdo derë: “Jo. Ka shumë gjëra të tjera argëtuese për të bërë jashtë këtu”.
Tani topi kalon te FIA
Pozicioni i pilotit holandez pasqyron plotësisht linjën politike të Red Bull: “Kjo është Formula 1, është pak për të ardhur keq – tha Verstappen – Ne përpiqemi të mbetemi pozitivë sepse po punojmë për të arritur këto ndryshime. Natyrisht, kush ka një avantazh të vogël do të përpiqet t’ua vështirësojë gjërat të tjerëve, por nëse FIA dhe Formula 1 do të jenë të forta në menaxhim, atëherë duhet thjesht të bëjnë ndryshimet”. Përplasja tashmë është totale.
