Irani ka shqyrtuar mundësinë e zgjerimit të konfliktit përtej Lindjes së Mesme, përfshirë sulme ndaj objektivave ushtarake amerikane në Evropë, nëse Shtetet e Bashkuara ndërmarrin një tjetër goditje ndaj Teheranit.
Sipas burimeve pranë regjimit iranian të cituara nga “Financial Times”, forcat iraniane kanë analizuar skenarë për sulme ndaj instalimeve ushtarake amerikane në Evropën Juglindore, përfshirë Bullgarinë. Sofja ka miratuar përdorimin e bazës ajrore Besmer nga avionët amerikanë të furnizimit me karburant.
Në listën e objektivave të mundshme për hakmarrje është përmendur edhe Qiproja, ku baza britanike në Akrotiri u godit nga një dron në mars.
Burimet kanë bërë të ditur gjithashtu se ushtria iraniane ka shqyrtuar mundësinë e goditjes së kabllove nënujore të komunikimit në zonën e Ngushticës së Hormuzit, në rast të një përshkallëzimi të mëtejshëm të konfliktit.
Sipas burimeve të “Financial Times”, në Teheran po rritet bindja se një përballje e re ushtarake me SHBA-në është çështje “kur” dhe jo “nëse”.
Negociatat për rihapjen e Ngushticës së Hormuzit kanë ngecur, ndërsa Presidenti amerikan Donald Trump deklaroi të martën se nuk ka bisedime apo kontakte në zhvillim me Teheranin.
Në rast të një konflikti të ri, zyrtarët iranianë kanë paralajmëruar se përgjigjja mund të mos kufizohet vetëm në objektivat amerikane në Lindjen e Mesme.
Siddharth Kaushal, studiues në Royal United Services Institute (RUSI), vlerëson se raketat iraniane mund të përbëjnë një kërcënim për instalimet amerikane në Evropën Jugore dhe Juglindore. Megjithatë, ai thekson se aftësia për të shkaktuar dëme të konsiderueshme në distanca shumë të mëdha mbetet e kufizuar.
Një burim i cituar nga FT paralajmëroi se nëse SHBA-ja “shkon shumë larg”, Irani mund ta zgjerojë konfliktin përtej rajonit.
