Policia e Durrësit ka finalizuar operacionin e koduar “Kalibri”, duke goditur dy raste të mbajtjes pa leje të armëve dhe municioneve luftarake. Si rezultat i aksionit, tre persona janë vënë në pranga, ndërsa janë sekuestruar armë zjarri, një granatë, municione dhe lëndë narkotike.
Sipas njoftimit zyrtar, operacioni u zhvillua nga Seksioni për Hetimin e Narkotikëve dhe Komisariati i Policisë Shijak, në bashkëpunim me Forcën e Posaçme Operacionale, në kuadër të kontrolleve për parandalimin e veprimtarive kriminale dhe rritjen e sigurisë publike.
Në hyrje të qytetit të Durrësit u arrestuan shtetasit L. D. dhe A. M., të dy banues në Lezhë. Ata u kapën duke lëvizur me automjet dhe dyshohet se po transportonin për ta shitur një armë zjarri pistoletë, së bashku me dy krehra dhe fishekë. Arma dhe municionet u gjetën në çantën e pasagjerit, ndërsa shtetasit L. D. iu gjet edhe një sasi e vogël lënde e dyshuar narkotike Cannabis Sativa.
Ndërkohë, gjatë kontrolleve të ushtruara në fshatin Shtrazë të Shijakut, policia arrestoi edhe shtetasin D. T. Në banesën e tij u gjetën dhe u sekuestruan një armë zjarri kallashnikov, një granatë mbrojtëse me ndezës të montuar, një krehër arme dhe qindra fishekë luftarakë, të cilat mbaheshin pa leje.
