Një grua ukrainase e përshkruar si "e armatosur dhe e rrezikshme" është e dyshuara kryesore për shpërthimin e bombës në Monako që plagosi rëndë një oligark ukrainas dhe partneren e tij.
Prokurori i përgjithshëm i Monakos, Stephane Thibaut konfirmoi se e dyshuara për sulmin është një grua ukrainase në të 30-at, me banim në Gjermani. Një burim pranë hetimit tha se gruaja dyshohet se ishte “përpjekur të dukej si burrë" gjatë sulmit, por u identifikua nga një dëshmitar.
Sipas të njëjtit informacion, “Protothema” shkruan se ajo ka të ngjarë të jetë larguar me bashkëpunëtorët e saj për në Itali, pa përjashtuar mundësinë që të ketë arritur në një nga vendet e Ballkanit.
Ajo vendosi eksplozivin që plagosi miliarderin 58-vjeçar Vadim Yermolaev, partneren e tij 46-vjeçare Anna Nasobina dhe djalin e tyre 13-vjeçar, të hënën në mbrëmje.
Shpërthimi ndodhi pak para orës 9 të mbrëmjes në hyrje të ndërtesës, kur një çantë shpine e braktisur shpërtheu pasi gruaja dyshohet se e aktivizoi pajisjen nëpërmjet telefonit të saj celular.
Nasobinës iu prenë të dyja këmbët nga shpërthimi, ndërsa Yermolayev u plagos rëndë nga copat e bombës dhe djegiet. Autoritetet vlerësojnë se ajo ishte rreth 12 metra larg kur shpërtheu pajisjen shpërthyese.
Autoritetet franceze po shqyrtojnë skenarë të ndryshëm, duke përfshirë mosmarrëveshje financiare, krimin e organizuar dhe konflikte të mundshme të lidhura me të kaluarën e biznesit të Yermolaev.
Ashtu si shumë oligarkë që grumbulluan pasuri pas rënies së Bashkimit Sovjetik, ai është përballur vazhdimisht me akuza për aktivitete të paligjshme, të cilat i mohon.
Ai thuhet se jeton në Monako që nga viti 2021. Në vitin 2019, ai hoqi dorë nga shtetësia e tij ukrainase dhe mori një pasaportë qipriote, ndërsa në dhjetor 2023, Kievi vendosi sanksione personale ndaj tij. ©LAPSI.al
