Më 25 tetor do të luhet El Clasico mes Barcelonës dhe Real Madrid. Në Spanjë, duket se kjo ndeshje ka nisur tashmë, pavarësisht se në mes janë angazhimet në Champions League dhe një tjetër javë kampionati, të cilën katalanasit dhe madrilenët duhet ta luajnë përpara se të përballen me njëri-tjetrin. Gjatë konferencës për shtyp në prag të ndeshjes Galatasaray-Barcelona, trajneri i katalanasve, Hansi Flick, u përball me një gazetar të Cadena SER, i cili e zhvendosi vëmendjen te supersfida spanjolle, duke lënë në plan të dytë përballjen me skuadrën turke.
“Orët e fundit është folur shumë për përjashtimin me karton të kuq të Vinicius dhe ka pasur kritika të vazhdueshme ndaj arbitrimit nga ana e klubit, nga Madridi dhe nga i gjithë ambjenti përreth tij. Për këtë arsye, doja të dija nëse mendon se këto kritika nxiten ose përforcohen nga fakti se ‘El Clasico’ kundër Barcelonës është afër. A ia atribuon këtë situatë?”, ishte pyetja e gazetarit.
Flick e dëgjoi me vëmendje, qëndroi për një çast në heshtje dhe më pas iu përgjigj: “A do të zgjidhje ndonjëherë të mos paraqiteshe në një konferencë për shtyp pas ndeshjes? Shpresoj që një ditë të mësosh edhe ti, ose që unë të mos më duhet kurrë të bëj apo t’i përgjigjem një pyetjeje… apo të flas për Real Madrid kur nuk luaj drejtpërdrejt kundër Real Madrid”.
‼️🗣️ HANSI FLICK, a pregunta de @santiovalle, sobre las protestas del REAL MADRID por el arbitraje: 😂 "Espero que aprendas algún día que nunca responderé a estas cuestiones..." ⌛️ "No quiero hablar de esto porque tenemos que centrarnos en el Galatasaray" https://t.co/j1oexIh9pH
— Carrusel Deportivo (@carrusel) October 12, 2026
Flick nuk e heq vëmendjen nga Galatasaray
Hansi Flick ka qenë gjithmonë një trajner i përqendruar te objektivi i momentit. Historikisht, tekniku gjerman i kushton vëmendje kundërshtarit me të cilin do të përballet në orët e ardhshme dhe vetëm më pas mendon për angazhimet e radhës. Kjo është filozofia e tij e punës dhe, siç tregoi edhe përgjigjja e dhënë në konferencën për shtyp, këtë herë nuk kishte ndërmend të vepronte ndryshe.
“Hajde tani, ne do të luajmë kundër Galatasaray dhe kemi respekt për atë skuadër. Është një ekip fantastik, me një stadium fantastik dhe një atmosferë fantastike”, shpjegoi Flick. “Sa më përket mua, nuk dua të flas për ta, sepse duhet të përqendrohemi te ndeshja jonë. Kështu punojmë ne dhe kjo është edhe ajo që dua për ekipin tonë. Ju kërkoj ndjesë”, shtoi trajneri i Barcelonës.
Pyetja për Real Madridin e vë në siklet teknikun gjerman
Flick nuk dëshiron të zbulojë më shumë nga sa duhet dhe as të përfshihet në një polemikë që, në këtë moment, nuk do t’i sillte dobi askujt. Për këtë arsye, ai zgjodhi të mos hynte në diskutimin e ngritur nga gazetari, duke reaguar në mënyrë profesionale dhe të përmbajtur, pavarësisht se ishte dukshëm i irrituar nga pyetja.
Gazetari iu referua polemikave të Real Madrid pas kartonit të kuq të marrë së fundmi nga Vinicius, duke e lidhur situatën me atë që kishte ndodhur disa javë më parë në ndeshjen kundër Atletico Madrid. Në atë derbi, pati ankesa për fishkëllimat ndaj lojtarëve, të cilat, sipas pretendimeve të ngritura në atë kohë, nuk ishin ndëshkuar siç duhej nga arbitri.
Megjithatë, Flick nuk dëshiron të merret me këtë çështje në këtë moment. Trajneri gjerman e ka të qartë se vëmendja duhet të jetë te Galatasaray, një kundërshtar që mund t'u krijojë vështirësi katalanasve. Për të, përballja e radhës është përparësia dhe diskutimet për El Clasicon apo polemikat që shoqërojnë Real Madridin mund të presin.
