Erion Braçe tha në një intervistë për Erla Mëhillin në Euronews se duan ta eleminojnë politikisht nga Partia Socialiste. Ai iu referua këtu nxjerrjes në media të debatit të tij me Edi Ramën në mbledhjen e fundit të Grupit Parlamentar.
I pyetur se kush kërkon ta vrasë politikisht, Braçe nuk dha asnjë emër, por la të kuptohet se përplasjet në PS ai i ka vetëm me njerëz që kanë probleme me ligjin.
“Unë s’kam problem me askënd në atë parti, me përjashtim të atyre që kanë probleme të rënda me ligjin”, tha Braçe.
Por kush ka probleme me ligjin në PS aktualisht dhe në këtë grup parlamentar? Natyrisht në top list qëndron Belinda Balluku, ndaj së cilës SPAK ka rënduar akuzat duke shtuar edhe dy të tjera, “korrupsion” dhe “pastrim parash”.
Duket sikur kjo insinuatë e Braçes shkon pikërisht për Belinda Ballukun, të cilën ai nuk e përmendi me emër sidoqoftë. Kujtojmë që Balluku ishte ajo që e largoi Braçen nga qarku Fier para zgjedhjeve të vitit 2025.
Tani, të jetë Balluku ajo që kërkon eleminimin politik të Erion Braçes nga PS-ja? Përgjigjen mund ta japë vetëm Braçe, i cili si në çdo mëkat tjetër të kësaj qeverisje, edhe kësaj radhe përjashtoi Edi Ramën nga skenari për ta eleminuar politikisht. Për Braçen, Rama asnjëherë nuk ka faj e as gisht. Ai qëndron lart me zotat dhe nuk mëkaton kurrë.©LAPSI.al
