Kylian Mbappé zgjodhi të fliste me fjalë përpara se ta bënte në fushë. Para ndeshjes Francë–Angli për vendin e tretë në Botërorin 2026, kapiteni i “Gjelave” i kushtoi një mesazh prekës Didier Deschamps, i cili drejtoi kombëtaren franceze për herë të fundit pas 14 vitesh në stol. Një përshëndetje ku ndërthuren mirënjohja, zhgënjimi dhe pesha e një mundësie të humbur: “Meritoje një fund më të bukur, por dështuam.”
Mesazhi lidhet me humbjen 2-0 ndaj Spanjës në gjysmëfinale, që i mohoi Francës mundësinë për të luajtur finalen e tretë radhazi të Kupës së Botës. Sulmuesi i Real Madrid nuk kërkoi justifikime. Menjëherë pas ndeshjes ai pranoi gabimet teknike dhe taktike të skuadrës, duke marrë edhe përgjegjësinë si kapiten. Megjithatë, në mesazhin e tij ai ndau atë humbje nga vlerësimi për të gjithë ciklin e Deschamps.
Aujourd’hui est ta dernière danse.
— Kylian Mbappé (@KMbappe) July 18, 2026
Toi qui nous as tant donné.
Nous aurions dû t’offrir une meilleure fin, mais nous avons échoué.
Mettre des mots sur ce que tu as apporté pendant 14 ans est très difficile, tant tu as été un acteur majeur du renouveau de cette équipe. Les gens… pic.twitter.com/uGQIWqodgv
Mesazhi i Mbappé për lamtumirën e Deschamps
“Njerëzit nuk kanë ditur gjithmonë ta vlerësojnë madhështinë tënde, por koha dhe historia do ta bëjnë këtë”, shkroi Mbappé, duke iu drejtuar drejtpërdrejt trajnerit. Një frazë që duket edhe si përgjigje ndaj kritikave të shumta që Deschamps ka marrë ndër vite për stilin e lojës së Francës, shpesh i konsideruar tepër pragmatik pavarësisht talentit të jashtëzakonshëm që kishte në dispozicion.
Rezultatet, megjithatë, flasin vetë. 57-vjeçari nga Bayonne udhëhoqi Francën drejt titullit botëror në vitin 2018, finales së Katar 2022, triumfit në Nations League dhe finales së Euro 2016. Ishte gjithashtu trajneri që i dha debutimin në kombëtare Mbappé kur ishte shumë i ri, e shoqëroi deri te titulli botëror në moshën 19-vjeçare dhe në vitin 2023 i besoi shiritin e kapitenit.
Ndeshja ndaj Anglisë përfaqësoi aktin e fundit të një bashkëpunimi që zgjati gati një dekadë. Në lojë ishte vetëm vendi i tretë, por për Mbappé dhe shokët e tij kjo sfidë kishte një domethënie edhe më të madhe, edhe pse nuk u arrit: t’i dhurohej Deschamps një fitore në ditën e lamtumirës. E ndoshta ky është një peng i madh për lojtarët francezë. Pas Botërorit do të nisë një epokë e re, me Zinedine Zidane që pritet ta pasojë, edhe pse Federata Franceze ende nuk e ka zyrtarizuar emërimin e tij.
