Po mbahet në Tiranë protesta e 19-të radhazi. Mijëra qytetarë u mblodhën fillimisht në sheshin Skënderbej dhe më pas marshuan drejt parlamentit ku iu zunë pritë deputetëve dhe lëshuan thirrje kundër tyre.
Më pas bënë një ndalesë përpara PD-së ku pati edhe disa përplasje të vogla me personat që ndodheshin në oborrin e selisë blu.
Më pas proetstuesit u stacionuan te Kryeministria. Qytetarët kërkuan dorëheqjen e kryeministrit Edi Rama dhe largimin e qeverisë së tij.
Gjatë tubimit u artikuluan kritika edhe kundër opozitës. Një nga sloganet që është bërë pjesë e protestave është “Opozita jemi ne”, duke shprehur refuzimin e protestuesve ndaj partive të vjetra politike dhe kërkesën për një përfaqësim të ri qytetar.
Protestuesit kanë paralajmëruar gjithashtu mesazhe kundër të gjithë klasës politike të vjetër, duke theksuar se përgjegjësia për situatën aktuale nuk i atribuohet vetëm mazhorancës, por edhe opozitës.
Për shkak të temperaturave të larta që kanë përfshirë vendin, organizatorët kanë vendosur që protestat të nisin në orën 19:00, në mënyrë që qytetarët të mund të marrin pjesë në kushte më të favorshme.
Pas fjalimeve pritet të ketë edhe sot marshim në rrugët e Tiranës. /LAPSI.al
