Të mërkurën, Parlamenti Europian i kërkoi Shqipërisë të pezullojë ndërtimet në zonat e mbrojtura, duke rritur presionin ndaj kryeministrit Edi Rama për projektin e një resorti luksoz të lidhur me Jared Kushner, i cili ka nxitur protestat më të mëdha në vend në dekada.
Shqipëria ka përjetuar 18 ditë protestash të pandërprera, të quajtura “Revolucioni i Flamingove”, kundër këtij projekti, si dhe protesta të organizuara nga diaspora shqiptare në Shtetet e Bashkuara, Britaninë e Madhe, Kanada, Francë, Gjermani, Itali, Suedi dhe Australi. Krahas kërkesës për ndalimin e projektit dhe shfuqizimin e ligjeve kyçe për investimet dhe zonat e mbrojtura, protestuesit kanë kërkuar edhe dorëheqjen e Edi Ramës.
“Protesta e flamingove tregon se qytetarët kujdesen për mbrojtjen e mjedisit dhe anëtarësimin në Bashkimin Europian. Ne do të qëndrojmë në krah të tyre, duke mbështetur protestën kundër aleatëve të Trump që shfrytëzojnë trashëgiminë e tyre natyrore dhe duke mbështetur rrugëtimin e tyre drejt BE-së”, tha eurodeputetja holandeze Tineke Strik, raportuese në hije e grupit të Gjelbërve/ Aleanca e Lirë Europiane për raportin e Komisionit Europian për Shqipërinë për vitin 2025.
-
Prestigjozja The Economist: Protestat e të rinjve po bëjnë nervoz Ramën
17 Qershor, 14:49
Ligjvënësit në Strasburg miratuan rezolutën e tyre mbi Raportin e Komisionit Europian për Shqipërinë për vitin 2025, duke kërkuar një moratorium të menjëhershëm për lejet e reja dhe ndërtimet në zonat e mbrojtura.
Ky veprim pasqyron paralajmërimet e vetë Komisionit Europian, i cili në raportin e tij dhe në javët e fundit ka theksuar se Shqipëria rrezikon të humbasë ritmin e procesit të anëtarësimit në BE nëse vazhdon me projektin pa një Vlerësim të Plotë të Ndikimit në Mjedis.
Parlamenti Europian dhe Komisioni Europian po i bëjnë gjithashtu presion Shqipërisë që të tërhiqet nga ndryshimet në ligjin për zonat e mbrojtura dhe të shfuqizojë ligjin për investimet strategjike, i cili hapi rrugën për projekte zhvillimi si ai i Jared Kushner.
“Europa duhet të kushtojë vëmendje të madhe ndaj asaj që po ndodh në Shqipëri. Nuk ka garanci më të mirë për rrugën drejt Bashkimit Europian sesa një popull i gjallë, i ndërgjegjshëm dhe i aftë të mobilizohet kundër kapitalizmit grabitqar, në mbrojtje të drejtësisë, të së mirës së përbashkët dhe të lirisë”, tha eurodeputetja italiane Ilaria Salis gjatë debatit të së martës.
Komisionerja për Zgjerimin, Marta Kos, u tha gazetarëve të hënën se kishte marrë “garanci nga Qeveria e Shqipërisë se do të kryhet një Vlerësim i Plotë i Ndikimit në Mjedis dhe se do të respektohen standardet europiane të mbrojtjes së mjedisit.”
-
“Al Jazeera”: Ç’po ndodh me ishullin Trump në Shqipëri (VIDEO)
15 Qershor, 21:18
Ajo shtoi gjithashtu se Shqipëria “është një nga vendet më të avancuara në procesin e zgjerimit dhe ka bërë përparim të rëndësishëm në mbrojtjen e mjedisit.”
Edi Rama reagoi ndaj rezolutës me një postim në Instagram, duke e kritikuar atë dhe ata që nisën protestat e fundit, ndërsa këmbënguli se: “Flamingot do të mbrohen, Vjosa-Narta do të mbrohet, ndërsa Zvërneci do të zhvillohet mbi bazën e një Vlerësimi të Ndikimit në Mjedis, sipas standardeve të Bashkimit Europian.”/Politico.eu
