Aktorja Emilia Clarke ka folur hapur për përvojën e saj të vështirë me dy hemorragji cerebrale që kërkuan ndërhyrje kirurgjikale, si dhe për ndikimin që ato patën në shëndetin e saj mendor.
Gjatë eventit Variety Power of Women London, Clarke tha se një dëmtim i trurit mund ta bëjë një person të ndihet sikur nuk do të jetë më kurrë ai që ka qenë më parë.
“Për disa vite ndihesha sikur e kisha mashtruar vdekjen dhe ajo do të vinte të më gjente. Mendoja se kisha bërë diçka të gabuar dhe nuk duhej të isha këtu,” u shpreh Emilia.
Aktorja e serialit Game of Thrones tregoi se hemorragjia e parë cerebrale ndodhi kur ishte 22 vjeç, pikërisht në kohën kur karriera e saj po merrte hov falë rolit të Daenerys Targaryen. E dyta ndodhi dy vite më vonë, kur ishte 24 vjeç.
Në vitin 2019, Emilia dhe nëna e saj, Jenny Clarke, themeluan organizatën bamirëse SameYou, e cila mbështet personat që kanë përjetuar hemorragji cerebrale apo dëmtime të tjera të trurit.
Aktorja tregoi se për shkak të angazhimeve intensive në punë nuk pati kohë të përpunonte traumën që kishte kaluar.
Ajo vazhdoi të punonte vetëm pak javë pas operacioneve, duke neglizhuar simptoma serioze si ankthi, problemet hormonale, dhimbjet fizike dhe madje edhe humbjet e vetëdijes.
“Kur mendon se kush je ti – personaliteti, intelekti, humori, kujtimet – të gjitha jetojnë në mendjen tënde. Dhe kur ajo të tradhton, mund të humbësh besimin te vetja dhe të bindesh se nuk do të jesh më kurrë ai person që ke qenë,” tha Clarke.
