Konferenca për shtyp e teknikut Roberto Mancini para Turqi-Itali pati një moment sikleti. Gjithçka nisi nga një gazetar vendas që vendosi të dilte nga tema e pyetjeve për ndeshjen e Nations League për ta pyetur me ngulm teknikun Mancini për çështjen Manchester City, pra klubin që dyshohet se është shpallur fajtor për një sërë shkeljesh të rëndësishme financiare në të kaluarën. Përkthyesi u duk në vështirësi të mëdha, deri në atë pikë sa pyeti trajnerin e të kaltërve nëse duhej ta përkthente pyetjen apo jo.
Në sallën e konferencës pati menjëherë disa momente ngërçi në përfundim të pyetjes së gjatë që iu bë Mancinit në turqisht. Trajneri i përfaqësueses ndoshta kuptoi diçka nga eksperienca e tij e kaluar në drejtimin e Galatasaray dhe, kur dikush theksoi “Një pyetje shumë e komplikuar…”, ai u përgjigj: “Por a jemi të sigurt që është vetëm një?”. Përkthyesi në atë pikë u kthye nga Mancini: “Ta përkthej apo jo?”, me trajnerin e të kaltërve paksa të hutuar (“Nuk e di…”).
“Çfarë mendoni për faktin që Manchester City është shpallur fajtor?”. Këto ishin fjalët që shkaktuan një buzëqeshje të hidhur te Mancio, i cili menjëherë saktësoi: “Nuk besoj aspak se është shpallur fajtor, përkundrazi”. Një nënvizim për të përsëritur se vendimi për fajësinë për 114 nga 115 akuzat e Premier League për shkelje financiare mes viteve 2009 dhe 2018, nuk është ende zyrtar. Në dukje i qetë, Mancini nuk u tërhoq as kur përkthyesi tentoi sërish të shmangte përkthimin në italisht të pyetjes së gazetarit turk: “Ka edhe pjesa tjetër… vazhdoj apo nuk komenton?”. Më pas mori guxim: “A është kontrata juaj e dyfishtë pjesë e kësaj çështjeje?”. Trajneri italian u tregua shumë i vendosur: “Nuk është një problem që më përket mua. Për më tepër, nuk është diçka e re, sepse, besoj, prej 4-5 vitesh del herë pas here. Manchester City nuk është fajtor dhe fakti që ka pasur kontratë të dyfishtë nuk më përket absolutisht mua, por është problemi i tyre, nëse është vërtet i tillë”.
Akuza ndaj teknikut Mancini në kuadër të çështjes së Manchester City, ku ai ishte trajner nga viti 2009 deri në vitin 2013, ishte se kishte përfituar nga një kontratë e dyfishtë për të anashkaluar rregullat. Një zyrtare me klubin prej pak më pak se 2 milionë eurosh në sezon dhe një “e fshehur” me Al Jazira, klub tjetër i së njëjtës pronësi si Citizens, me rreth 2 milionë euro, zyrtarisht për 4 ditë konsulencë në vit. Paratë dyshohet se kalonin përmes një kompanie italiane të lidhur me të.
Por në fund të fundit, cili është përkthimi real në italisht i pyetjes së gazetarit turk? Këto ishin fjalët e tij: “Flitet se Manchester City mund të përjashtohet nga Premier League për shkak të shkeljeve të shumta financiare. A besoni se klubi është i pafajshëm? Drejtuesit e klubit akuzohen se nuk mund të justifikojnë burimin e pagesave që ju kanë bërë gjatë periudhës suaj si trajner. A keni marrë ndonjëherë pagesa nga një klub me seli në Abu Dhabi? A ju kanë kontaktuar hetuesit? Faleminderit”. Përkthyesi ishte shumë më i butë në parashtrimin e pyetjes, duke e lehtësuar atë jo pak.
