Një aksident rrugor është regjistruar mëngjesin e kësaj të enjteje në autostradën Lushnjë–Fier, pranë kryqëzimit të njohur si "Pushimi i Shoferit". Dy automjete u përplasën, ndërsa një person mbeti i plagosur. Sipas të dhënave paraprake, drejtuesi i një automjeti tip Volkswagen ka hyrë në kryqëzim nga rruga dytësore e Divjakës. Në atë moment, ai është përplasur me një minifurgon që po lëvizte në drejtim të Fierit.
Si pasojë e aksidentit, drejtuesi i Volkswagen-it u transportua me ambulancë në spitalin e Lushnjës. Fatmirësisht, ai ndodhet jashtë rrezikut për jetën. Policia mbërriti në vendngjarje dhe po punon për zbardhjen e shkaqeve të aksidentit. Përplasja ka shkaktuar trafik të rënduar, me radhë automjetesh për disa kilometra në korsinë drejt Fierit.
