Tensionet mes Shteteve të Bashkuara dhe Iranit janë përshkallëzuar ndjeshëm. Uashingtoni kreu një valë sulmesh ajrore ndaj më shumë se 80 objektivave ushtarake iraniane. SHBA fajësoi Teheranin për sulmet ndaj tre cisternave të naftës në Ngushticën e Hormuzit.
Sipas Komandës Qendrore të SHBA-së (CENTCOM), operacioni goditi mbi 60 mjete detare të Gardës Revolucionare. Mediat iraniane raportuan se sulmet prekën zonat e Qeshm, Bandar Abbas dhe Sirik, ku pati të plagosur. Irani reagoi menjëherë, duke njoftuar se kishte lëshuar raketa dhe dronë ndaj 85 objektivave amerikane në Bahrein dhe Kuvajt, përfshirë selinë e Marinës Amerikane dhe një bazë ajrore. Teherani akuzoi gjithashtu SHBA-në për shkelje të memorandumit të mirëkuptimit të nënshkruar muajin e kaluar.
Përshkallëzimi vjen pavarësisht marrëveshjes së arritur muajin e kaluar mes SHBA-së dhe Iranit për zgjatjen e armëpushimit dhe uljen e tensioneve në rajon.
Sekretari i Përgjithshëm i NATO-s, Mark Rutte, mbështeti veprimet e Uashingtonit, duke i cilësuar sulmet “absolutisht të nevojshme”. Nga samiti i NATO-s në Ankara, ai deklaroi se reagimi amerikan ishte i justifikuar. Sipas tij Irani kishte shkelur armëpushimin me sulmet ndaj anijeve në Ngushticën e Hormuzit.
Deklarata e Rutte pritet të shtojë debatet mbi zhvillimet në Lindjen e Mesme, ndërsa tensionet në Gjirin Persik vazhdojnë të rrisin shqetësimet për sigurinë e transportit ndërkombëtar të naftës.
