Rritja e çmimeve të karburantit ka nxitur protesta në Portugali, ku rreth 500 kamionë kanë dalë në rrugë në veri të vendit, ndërsa në Lisbonë shoferët kanë protestuar me boritë e automjeteve. Marshimi nisi në orët e para të mëngjesit në një zonë industriale në periferi të Portos. Kamionët e kompanive të ndërtimit që nuk përfitojnë nga subvencionet e qeverisë për sektorin e transportit, u nisën drejt Coimbrës.
Konvoji ka përshkuar autostradën që lidh veriun me jugun e Portugalisë dhe pritet të përshkojë rreth 140 kilometra. Në nisje, kamionët kanë lëvizur me shpejtësi të reduktuar në korsinë e djathtë, pa bllokuar plotësisht qarkullimin e automjeteve të tjera.
Mediat shkruajnë se protestuesit kërkojnë uljen e taksave mbi karburantet, si dhe pezullimin e disa tarifave dhe masave të punës në distancë. Ata shprehen se rritja e vazhdueshme e kostove po e vështirëson ndjeshëm aktivitetin e tyre. Në Lisbonë, drejtuesit e mjeteve kanë organizuar një protestë me përdorimin e borive në një nga urat mbi lumin Tagus, duke kundërshtuar çmimet e larta të karburanteve.
Çmimet e karburanteve në Portugali kanë arritur nivele rekord gjatë kësaj jave. Sipas të dhënave të Drejtorisë së Përgjithshme të Energjisë, çmimi mesatar i naftës ka kaluar 2.22 euro për litër, ndërsa benzina ka arritur në rreth 2.11 euro për litër. Përballë situatës, qeveria portugeze ka marrë disa masa për të kufizuar ndikimin e rritjes së çmimeve. Që prej marsit janë ulur taksat mbi karburantet, ndërsa janë parashikuar edhe mekanizma për ndërhyrje në rast të krizave energjetike.
