Shqipëria kërkon t’i paraprijë samitit të NATO-s që është paralajmëruar se do të mbahet në Tiranë vitin e ardhshëm duke rritur shpenzimet ushtarake në 2% të GDP-së.
Lapsi.al mëson se thirrja e seancës më datë 30 korrik në Parlament, edhe pse ky sesion ka përfunduar, lidhet pikërisht me miratimin e një marrëveshje Shqipëri-SHBA, e cila do të shqyrtohet gjithashtu edhe gjatë javës së ardhshme nëpër komisionet parlamentare.
Deri më tani ka pak të dhëna rreth marrëveshjes. Mazhoranca e ka mbajtur diskrete këtë cështje, por burime pranë Kuvendit i thanë Lapsi.al se bëhet fjalë për një marrëveshje rreth 300 milionë dollarë për pajisje të ndryshme ushtarake dhe armatimeve.
Deri më tani Shqipëria shpenzon 1,6% të Produktit të Brendshëm Bruto për mbrojtjen. Për të shmangur çdo rezervë që mund të ndikojë në organizimin e samitit të NATO-s në Tiranë, qeveria po nxiton të nënshkruajë një marrëveshje, e cila për momentin nuk dihet nëse do të jetë në formë kredie apo blerje direkt nga të ardhurat e buxhetit të shtetit.
Natyrisht që vlera është e lartë për një vend si Shqipëria, e cila ka dhe ambicie për të ringritur industrinë ushtarake me ndihmën e izraelitëve të afërt me Edi Ramën. ©LAPSI.al
