Përtej pasionit për politikën dhe instiktit për biznesin, Agron Shehaj ka treguar se është edhe në formë të mirë fizike për moshën që ka. Sidomos kur bëhet fjalë për një marrëveshje të fshehur me SHBA që prezantohet dhe votohet brenda së njëjtës ditë në kuvend.
Ndërsa opozita ka ngritur zërin duke kërkuar transparencë në kuvend, Shehaj u pa duke nxituar drejt sallës ku deputetëve u ishte vënë në dispozicion kopja e marrëveshjes së huasë prej 302 milionë dollarësh nga Shtetet e Bashkuara për pajisje ushtarake.
Pas futjes me procedurë të përshpejtuar të projektligjit, deputetët mund ta konsultojnë dokumentin vetëm në ambientet e Kuvendit, pasi fillimisht të firmosin deklaratën e konfidencialitetit, për shkak të klasifikimit të tij.
Por në një video që po qarkullon nga brenda korridoreve të kuvendit shihet momenti kur Shehaj hyn në sallën ku ndodhet marrëveshja e klasifikuar, merr kopjen dhe largohet me nxitim në korridor i ndjekur nga punonjësit e administratës së kuvendit.
Video ku Agron Shehaj shihet duke vrapuar me marrëveshje në dorë po qarkullon me shpejtësi në rrjetet sociale, shoqëruar edhe ndonjë batutë humori.
Por kur transparenca kthehet në një luks që opozita nuk e ka, më mirë të kesh një deputet që vrapon me dokumenta në duar i ndjekur nga garda, se sa të shohësh disa të tjerë që ngrenë kartonin jeshil dhe votojnë pro, pa ditur fare se çfarë po votojnë.
