Sokrat Vata dhe 10 persona të tjerë të arrestuar pas vrasjes së 20-vjeçarit Luis Miguel Varela Mendes në Ksamil dalin këtë të premte para Gjykatës së Sarandës. Sot pritet të caktohen masat e sigurisë ndaj tyre. I riu, me shtetësi portugeze dhe banim në Francë, u vra me thikë në orët e para të 18 gushtit, vetëm dy ditë pasi kishte mbërritur në Shqipëri.
Sipas hetimeve, konflikti nisi pas një feste në klubin “Principote”. Pas daljes nga lokali, mes disa turistëve pati debat me tone të larta. Në konflikt ndërhynë më pas edhe punonjës të kompleksit. Policia njofton se bashkëpunëtori kryesor në vrasjen e turistit portugez është shtetasi David Heurtevent, banues në Tiranë, i cili sipas 'Bluve' e ka goditur me grushta 20-vjeçarin, në momentin që Vata e ka qëlluar me thikë. Mendes humbi jetën në një shezlong pranë klubit.
Vata u arrestua më pas në Levan. Ai u gjet i fshehur në bagazhin e makinës së një çifti turk, të cilët dyshohet se po e ndihmonin të largohej drejt Tiranës. Heurtevent vijon të jetë në kërkim. Në pranga përfunduan edhe katër kamerierë dhe katër truproja të kompleksit. Mes truprojave ka një efektiv policie, një punonjës burgu dhe një polic bashkiak. Sipas hetimeve, ata nuk ndërhynë për të parandaluar ngjarjen dhe nuk njoftuan policinë. Në kërkim është shpallur edhe pronari i “Principote”, i cili dyshohet se ishte i pranishëm në momentin e ngjarjes, por u largua pa e kallëzuar atë.
