Gjykata e Sarandës vendosi sot të lërë në burg Sokrat Vatën, 29-vjeçarin e akuzuar për vrasjen e turistit portugez Luis Miguel Varela Mendes në Ksamil.
Para trupit gjykues, Vata ka pretenduar se e ka goditur viktimën me thikë në kushtet e vetëmbrojtjes.
Sipas dëshmisë së tij, konflikti ka nisur në një lokal, ku ndodhej një grup turistësh francezë. Vata ka deklaruar se turistët po bënin zhurmë dhe se një prej shokëve të tij u ka kërkuar të ruanin qetësinë.
Sipas versionit të paraqitur prej tij në gjykatë, turistët kanë vijuar me sharje dhe më pas situata është përshkallëzuar në një përleshje fizike.
Vata ka pretenduar se gjatë konfliktit njëri prej turistëve kishte një thikë. Sipas tij, ai arriti t'ia marrë armën e ftohtë pasi e neutralizoi.
Por, sipas dëshmisë së tij, në atë moment njëri prej turistëve e ka goditur me shkelm në nofull, duke e rrëzuar në tokë.
Vata ka deklaruar se, ndërsa turistët po tentonin ta godisnin sërish, ai ka lëvizur dorën instinktivisht për t'u mbrojtur, por nuk kujton mënyrën se si e ka goditur viktimën.
“Nuk e kujtoj si e kam goditur. Isha në shok. Nuk e dija nëse ndonjëri prej tyre ishte plagosur, pasi ishin shumë. Nga shoku jam larguar”, - ka deklaruar Vata para gjykatës.
Dëshmia e turkut Nuh Mahmutoglut
Në sallën e gjyqit ka dëshmuar edhe shtetasi turk Nuh Mahmutoglu, i cili njihej me Vatën për shkak të bashkëpunimit në shoqërimin e turistëve.
Mahmutoglu ka deklaruar se Vata e ka telefonuar rreth orës 06:30 dhe i ka kërkuar ta shoqëronte drejt Tiranës. Sipas tij, Vata i kishte thënë se ishte rrëzuar nga motori.
Edhe personat e tjerë të ndaluar në lidhje me ngjarjen kanë mbajtur qëndrim mohues para gjykatës. Ata kanë deklaruar se nuk e kanë parë momentin e përleshjes dhe nuk kanë dijeni të drejtpërdrejtë për mënyrën se si ndodhi goditja fatale.
Në përfundim të seancës, Gjykata e Sarandës vendosi masën e sigurisë “arrest në burg” për Sokrat Vatën. E njëjta masë është caktuar edhe për Ezgi Parlak dhe Nuh Mahmutoglu, dy shtetas turq që, sipas hetimeve, tentuan ta largonin me makinë Vatën pas ngjarjes.
Për kamarierët Ildi Cekani dhe Ardit Kasemi është vendosur masa e arrestit në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun, Murat Zhabinën dhe Kristo Koshon, gjykata ka caktuar masën e sigurisë “detyrim për t'u paraqitur në policinë gjyqësore”. /LAPSI.al
