Pak njerëz e dinë, por shumë prej refrenëve të hiteve të njohura të momentit, të luajtura kudo nëpër radiot botërore, janë shkruar nga artistja me origjinë shqiptare, Bebe Rexha (anglisht e prononcojnë Bibi Reksa).
Prindërit e saj emigruan diku rreth viteve ’80 në New York, ndërsa talenti i vajzës së tyre do të spikaste nga bashkëpunimet e rëndësishme me Rihanna & Eminem (Monster), David Guetta (Hey Mama), G-Eazy (Me myself and I), etj.
Viti 2016 do të qe koha kur artistja përmes skuadrës së “Warner Bros” e cila e menaxhon, programuan lançimin e saj solo.
Mjaftoi një shndërrim në look, nga brune në bjonde, dhe Bebe Rexha duket se ishte gati për t’iu servirur publikut.
Shpesh e kanë krahasuar me stilin e Rita Orës, sikur e imiton, por krejtësisht e ndryshme në muzikë, Bebe Rexha ka publikuar sot për herë të parë, videon e cila duket se do të vendosë fatin e saj në industrinë muzikore.
Teksti i saj flet për qejfet, muzikën, dëshirën e të rinjve për t’u argëtuar pa menduar gjatë… ndërsa bashkëpunimi me reperen më të famshme amerikane, Nicki Minaj, premton ta fusë shqiptaren Bebe Rexha në listën A të artistëve botërorë.
