Policia ka bërë sekuestrimin e rreth 46 kilogramëve lëndë narkotike në Aeroportin Ndërkombëtar të Rinasit, pas një operacioni të zhvilluar nga autoritetet. Kontrolli i dërgesës u krye pasi autoritetet vendase kishin marrë më herët një sinjalizim nga autoritetet kanadeze për një ngarkesë të dyshimtë.
Sipas informacioneve paraprake, për transportimin e drogës dyshohen tre persona, një çift me shtetësi shqiptare dhe një shtetas i huaj. Njëri prej tyre, Kristian Gjoni, dyshohet se tentoi t’i shmangej kontrollit duke pretenduar se bashkëshortja e tij ishte shtatzënë dhe nuk mund t’i nënshtrohej procedurës.
Pas verifikimeve mjekësore rezultoi se pretendimi nuk ishte i vërtetë. Më pas, çifti dhe personi tjetër u arrestuan, ndërsa hetimet vijojnë për të sqaruar plotësisht rrethanat e ngjarjes dhe rolin e secilit prej të përfshirëve.
