Këngëtari Erind Xhaferi është arrestuar nga policia e Fierit, pas dyshimeve për përndjekjen e disa vajzave të mitura dhe kryerjen e veprimeve të turpshme ndaj tyre.
Sipas informacioneve paraprake, kanë qenë vetë vajzat që kanë telefonuar sallën operative të policisë, duke vënë në lëvizje shërbimet e Komisariatit të Fierit. Pas marrjes së denoncimit, efektivët kanë kryer verifikimet në terren dhe kanë organizuar veprimet për dokumentimin e rastit. Xhaferi është ndaluar dhe më pas është shoqëruar në ambientet e Drejtorisë Vendore të policisë Fier.
Burime policore bëjnë me dije se ndaj tij ngrihen dyshime për veprën penale “Vepra të turpshme”, të parashikuar nga neni 108 i Kodit Penal. Hetimet vijojnë për të zbardhur rrethanat e plota të ngjarjes, ndërsa materialet i janë referuar Prokurorisë së Fierit për veprime të mëtejshme.
