Banorët e Divjakës vijuan për të 23-tën ditë radhazi protestën kundër propozimit të PS për hartën e re territoriale. Projekti parashikon bashkimin e Divjakës me Lushnjën, një variant që kundërshtohet nga banorët.
Protestuesit thonë se nuk do të tërhiqen dhe se kërkojnë që Divjaka të mbetet bashki më vete. Gjatë fjalimeve, qytetarët i kërkuan qeverisë ta heqë Divjakën nga projekti i ri territorial. Thirrje pati edhe për administratën vendore e deputetët e zonës që t’i bashkohen protestës. Sipas banorëve, shkrirja e bashkisë do të dëmtonte identitetin e zonës dhe do të vështirësonte marrjen e shërbimeve.
“Divjaka ka natyrën, pyjet, lagunën dhe bukurinë që nuk e gjen kudo. Ne kërkojmë vetëm që zëri i banorëve të dëgjohet”, tha një prej protestuesve. Pas fjalimeve, qytetarët vijuan marshimin në rrugët e Divjakës, duke u bërë thirrje edhe banorëve të tjerë t’u bashkohen.
