Protesta kundër qeverisë hyri sot në ditën e saj të 28-të, duke u shndërruar në një nga mobilizimet më të gjata qytetare të viteve të fundit. Qytetarët u mblodhën si çdo mbrëmje në sheshin "Skënderbej". Ata marshuan drejt Kryeministrisë, ku për më shumë se dy orë e gjysmë mbajtën fjalime dhe përsëritën kërkesën kryesore: dorëheqjen e kryeministrit Edi Rama dhe të qeverisë.
Përfaqësues të komuniteteve shqiptare brenda dhe jashtë vendit morën fjalën, duke shprehur mbështetjen për lëvizjen dhe duke bërë thirrje për vazhdimin e protestave.
Pas qëndrimit përpara Kryeministrisë, protestuesit marshuan në rrugët e Tiranës. Ata kaluan në zonën e ish-Bllokut dhe duke u bërë thirrje qytetarëve t'u bashkoheshin. Gjatë gjithë marshimit u dëgjuan sloganet "Rama, jep dorëheqjen", "Pa rini nuk ka Shqipëri", "Poshtë patronazhistët" dhe "Edi Rama, o tradhtar, me Shqipërinë mos bëj pazar".
Një nga njoftimet më të rëndësishme të mbrëmjes ishte propozimi për ngritjen e një Kuvendi Kombëtar qytetar. Sipas organizatorëve, puna për krijimin e tij ka nisur dhe deri tani janë identifikuar rreth 500 kandidatë potencialë. Nga ta do të përzgjidhen 300 përfaqësues që do të prezantohen publikisht dhe do të zgjidhen në mënyrë transparente.
Në protestë mori pjesë edhe eurodeputetja italiane Ilaria Salis, e cila mbajti një fjalim në mbështetje të protestuesve. Ajo deklaroi se ishulli i Sazanit dhe zona e Nartës duhet të mbeten të mbrojtura. Salis kritikoi projektet e zhvillimit që bazohen në korrupsion. Në përfundim të fjalës së saj, Salis shprehu mbështetje për atë që e quajti "Revolucioni i Flamingove".
Organizatorët kanë bërë të ditur se protestat do të vazhdojnë çdo ditë deri në plotësimin e kërkesave të tyre.
